Caru Bangor

Llynedd cafodd yr ymgyrch Caru Bangor ei lansio gan Undeb Myfyrwyr Bangor, ac yn dilyn ei lwyddiant a’r gefnogaeth a gafodd, mae’r ymgyrch nôl gyda hyd yn oed mwy o gariad eleni! Mae yna sawl rhan i’r ymgyrch yma, sydd yn annog myfyrwyr i gymryd balchder yn eu cymuned leol trwy brosiectau fel ‘Sbydwch y Sbwriel’ ar ddiwedd y flwyddyn academaidd ddiwethaf pan gafodd 17.1 tunnell o wastraff ei gadw o strydoedd Bangor ym mhythefnos olaf y tymor. Eleni mae gennym lawer o wahanol ymgyrchoedd ar y gweill, gan gynnwys yr ymgyrch ailgylchu a’r ymgyrch Myfyrwyr yn eu Blodau, sef cystadleuaeth arddio, ac wrth gwrs bydd gennym ymgyrch gyffrous arall ar ddiwedd y flwyddyn academaidd.

Yr ail agwedd o Ymgyrch Caru Bangor yw codi ymwybyddiaeth o’r pethau cadarnhaol mae myfyrwyr yn eu cynnig i’r ardal leol, fel y 500+ o oriau mae’n fyfyrwyr yn eu gwirfoddoli i helpu dros 250 o bobl y ddinas a’r cylch pob wythnos, a hynny dim ond o ystyried y rheiny sy’n gwirfoddoli trwy brosiectau GMB. Fel rhan o’r ymgyrch i godi ymwybyddiaeth byddwn yn dechrau prosiect Cynrychiolwyr Caru Bangor, ble bydd myfyrwyr sy’n byw mewn tai yn y gymuned yn gwirfoddoli i ateb cwestiynau myfyrwyr eraill sy’n symud i fyw i’r un cylch i’w helpu i ymgynefino, a hefyd i gynrychioli buddiannau’r myfyrwyr hynny sy’n byw yn yr ardal mewn cyfarfodydd cymunedol ac o fewn yr Undeb.

Ac yn olaf, ond wrth gwrs nid leiaf, Cerdyn Caru Bangor! Ers blynyddoedd rydych chi wedi cael y cyfle i arbed arian wrth siopa gyda chwmnïoedd cenedlaethol fel Matalan ac Amazon yn sgìl y cerdyn NUS Extra ond yn anffodus nid yw llawer o’r siopau cenedlaethol sy’n cymryd rhan yn y cynllun â phresenoldeb ym Mangor i chi allu cymryd mantais o’r holl gynigion yma. Dyna ble y daw Caru Bangor i’r bwlch. Gyda’r cynigion cenedlaethol, nid yn unig ydych chi’r myfyrwyr yn colli allan oherwydd yr angen i archebu popeth ar y we er mwyn cael manteisio ar y prisiau rhatach mae NUS Extra yn eu cynnig, ond mae busnesau lleol ac economi lleol Bangor yn colli allan hefyd. Mae’r Undeb wedi cael dros 45 o fusnesau lleol i arwyddo i’r ymgyrch a chynnig amryw o ostyngiadau a bargeinion i’r myfyrwyr hynny sy’n prynu cerdyn Caru Bangor. Felly am £11 gallech arbed hyd at 20% ar bethau fel:

• Dillad:
  Burton, Krypton Clothing, Sparx, Zero,
• Bwyd:
  1815, Brathiad y Ddraig, Café Rosso, G. Williams a’i Fab, Bwyty Garden Cantonese, Options, Orient Expresso, Royal Tandoori, Spicy Vujon, The Whistlestop Café, Yo’ Mamas.
• Gwallt a Cheinder:
  Barbwr Lads & Dads, Glamour Room, Gwallt CK, HQ Unisex Hairsalon, Linda’s Barbers, Natalie’s Nails, New Image, RMB Salon, Shine and Glimmer, TH1Hairdressing & Beauty Salon
• Gwasanaethau:
  Computer MOT Centre, Garej Elias, Gofal Llygaid Bangor, Mrs M W Williams Optegydd, Photo Imaging North Wales, Redskin Tattoo, ZIP Print
• A llawer o bethau eraill:
  Arthaus 61, Go For It Sports, Siop Viv, Muse, Nice and Naughty, Paraphernalia, Revolution Bikes, Sew Wise, The Flower Centre, The Great Arete, The Jewellery Box, The Vibez Centre, Trespass

Archebwch eich cerdyn!