Gwobrau’r Cymdeithasau

Bob blwyddyn bydd Undeb y Myfyrwyr yn cynnal Noson Wobrwyo a fydd yn dathlu’r gorau o’r hyn mae ein Cymdeithasau Myfyrwyr yn ei wneud.

Er mwyn cael cyfle o guro Tlysau Gwobrwyo’r Cymdeithasau, rhaid i’r cymdeithasau a’r unigolion sy’n eu rhedeg gael eu henwebu gennych CHI.

Mae yna wahanol gategorïau gwobrwyo y gall eich cymdeithasau gael eu henwebu ar eu cyfer, felly gwnewch yn siŵr o anfon eich enwebiadau!

Cymdeithas y Flwyddyn

Bydd Cymdeithas y Flwyddyn wedi cyflawni lefelau uchel o gyfranogiad mewn gweithgareddau a digwyddiadau ar gyfer aelodau; wedi denu aelodau newydd a chadw hen aelodau; wedi cynnal ystod eang o weithgareddau a digwyddiadau wedi’u trefnu’n dda drwy gydol y flwyddyn, gan ddefnyddio cyhoeddusrwydd wedi’i gynllunio’n dda mewn amrywiaeth eang o gyfryngau.

Bydd aelodau’r gymdeithas wedi cael lefel uchel o fwynhad o ganlyniad i gymryd rhan gyda’r gymdeithas a bydd y pwyllgor wedi cael ymateb da gan yr aelodau.

Bydd y gymdeithas yn y pendraw wedi cyfoethogi’r profiad myfyrwyr ac wedi mynd tu hwnt i Nodau ac Amcanion y Gymdeithas a gwella ar y gweithgareddau a gynhaliwyd mewn blynyddoedd blaenorol.

Gwobr y Gymuned

Mae’r wobr hon ar gyfer cymdeithas sydd wedi gwneud cyfraniad eithriadol at wella Bangor a chysylltiadau cymunedol ac wedi sefydlu perthynas â’r gymuned leol y tu hwnt i’r hyn sydd fel arfer yn cael ei gyflawni gan y gymdeithas. Gall hynny gynnwys (ond heb gael ei gyfyngu i) fentrau codi arian lleol, digwyddiadau cymunedol, datblygiad cymunedol, lobio gwleidyddol, ymgyrchu neu unrhyw beth sydd wedi cael effaith ar fywydau pobl leol.

Gwobr Gwelliant Mwyaf

Bydd y Gymdeithas sydd wedi gweld y Gwelliant Mwyaf wedi arddangos newid, twf a datblygiad clir o flynyddoedd blaenorol, gyda hynny’n arwain at welliant yn yr ystod ac amrywiaeth o weithgareddau a digwyddiadau a gynhelir ar gyfer eu haelodau. Byddant wedi cynyddu eu haelodaeth a chyfranogiad yn eu digwyddiadau drwy gydol y flwyddyn, gan arwain iddyn nhw (a’u digwyddiadau) gael proffil uwch ar y campws.

Cymdeithas Newydd Orau

Mae’r wobr hon ar gyfer y gymdeithas newydd orau i ymgysylltu ag UM ers Noson Wobrwyo ddiwethaf y Cymdeithasau , un sydd wedi denu digonedd o aelodau, sydd â phwrpas clir ac sydd wedi cyflawni ei nodau penodedig, ond sydd ar yr un pryd wedi arddangos ei photensial ar gyfer twf a datblygiad yn y dyfodol tu hwnt i’w blwyddyn gyntaf o weithgaredd, ac wedi dangos ei bod yn Gymdeithas sydd yma i aros.

Cymdeithas Ryngwladol y Flwyddyn

Bydd Cymdeithas Ryngwladol y Flwyddyn wedi cynnig cefnogaeth, rhwydweithio a chyfleoedd cymdeithasol ar gyfer myfyrwyr rhyngwladol ac ar yr un pryd wedi agor eu cymdeithas i fyfyrwyr sydd â diddordeb mewn diwylliannau ac ieithoedd tramor, gan wahodd pawb i gymryd rhan mewn amrywiaeth eang o ddigwyddiadau.

Cymdeithas Academaidd y Flwyddyn

Dylai cymdeithasau academaidd gynnig rhywbeth yn ychwanegol i addysg yr adran gydag ystod o weithgareddau allgyrsiol fel sgyrsiau, teithiau maes a gwaith gwirfoddol, i ehangu meddyliau eu haelodau ac ar yr un pryd fod yn bleser a chynnig cyfleoedd cymdeithasol. Bydd enillydd y wobr yn dangos ymroddiad i gynnig gwybodaeth a phrofiad i aelodau sy’n ymddiddori yn y pwnc cymaint ag i aelodau sy’n astudio’r pwnc ar gyfer eu gradd.

Cyrhaeddiad y Flwyddyn

Mae Cyrhaeddiad y Flwyddyn yn gategori gweddol agored; bydd y wobr yn mynd i gymdeithas sydd wedi gwneud rhywbeth rhyfeddol, boed hynny’n fater o oresgyn anawsterau eithafol neu gyflawni rhywbeth ymhell tu hwnt i unrhyw beth a ddisgwylid gan y gymdeithas.

Ymgyrch y Flwyddyn

Mae gan gymdeithasau potensial enfawr i sicrhau newidiadau cadarnhaol, p’un ai bod hynny dros fyfyrwyr, dros yr ardal leol neu hyd yn oed o ran gwneud gwahaniaeth yn genedlaethol neu’n fyd-eang. Bydd gwobr Ymgyrch y Flwyddyn yn cael ei dyfarnu i’r gymdeithas sydd wedi gweithio caletaf i wneud gwahaniaeth i ryw fater o’u dewis. Bydd yr ymgyrch wedi defnyddio creadigrwydd i gyflawni ei amcanion ac wedi defnyddio amrywiaeth eang o’r adnoddau a sianelau cyfathrebu sydd ar gael. Bydd wedi ymgysylltu â myfyrwyr ac wedi’u perswadio nhw i weithredu.

Cymdeithas Ffydd y Flwyddyn

Bydd Cymdeithas Ffydd y Flwyddyn wedi cefnogi anghenion ysbrydol eu haelodau drwy raglen gynhwysfawr o ddigwyddiadau, ac ar yr un pryd wedi annog eraill i gymryd rhan a darganfod mwy. Byddant wedi ymgymryd â gweithgareddau rhyng-grefyddol, gan weithio gyda chymdeithasau a grwpiau ffydd eraill i gynorthwyo myfyrwyr i archwilio a darganfod eu bywyd ysbrydol. Bydd y gymdeithas wedi gweithio gyda’r gymuned ffydd leol a’r gymuned ffydd myfyrwyr drwy gydol y flwyddyn.

Gwobr Elusen

Mae llawer o gymdeithasau myfyrwyr yn codi arian at achosion da ac elusennau. Mae’r wobr yma’n bodoli i wobrwyo’r prosiectau codi arian mwyaf blaengar a chyffrous sydd â’r mwyaf o ymrwymiad. Bydd yr enillydd wedi codi proffil codi arian at elusen gan fyfyrwyr ar lefel y brifysgol, neu ar lefel lleol neu ar lefel genedlaethol, wedi codi ymwybyddiaeth ymysg y corff myfyrwyr am yr achos neu elusen maent yn codi arian ar ei gyfer ac wedi gwneud cyfraniad sylweddol at eu hachos dethol.

Digwyddiad y Flwyddyn

Mae’r wobr hon hefyd yn gategori weddol agored; bydd y wobr yn mynd i gymdeithas sy’n gallu arddangos iddynt allu cynnal digwyddiad gwell nag unrhyw gymdeithas arall, digwyddiad a gadwodd ddiddordeb pawb am fisoedd wedyn, digwyddiad a fynychwyd gan fyfyrwyr o bob cefndir, nid dim ond aelodau rheolaidd, digwyddiad sy’n gwbl wahanol i unrhyw beth mae Bangor wedi’i brofi o’r blaen.

Gwobr Perfformiad Gorau

O ddramâu at gyngherddau, o gomedi at ddawns, mae yna berfformiadau di-rif yn digwydd ym Mangor... ond beth oedd yr un orau eleni? Caiff y Wobr Perfformiad ei chyflwyno i’r perfformiad mwyaf blaengar a llwyddiannus, a hyrwyddwyd orau ac a gafodd y gefnogaeth fwyaf, gan fyfyrwyr ac aelodau o’r gymuned leol.

Gwobr Amgylcheddol

Caiff y Wobr Amgylcheddol ei dyfarnu i gymdeithas sy’n gallu arddangos ei bod wedi gwneud cyfraniad cadarnhaol i ‘Faterion Gwyrdd’, naill ai drwy godi ymwybyddiaeth, ymrwymo â myfyrwyr, lobïo'r brifysgol, cynnal ymgyrch, neu’n syml drwy gymryd cynaladwyedd i ystyriaeth yn ei gweithgareddau rheolaidd.

Cydweithio Gorau

Mae’r Wobr Cydweithio yn gwobrwyo cymdeithasau sy’n cydweithio â’i gilydd i gyfoethogi’r profiad myfyrwyr ym Mangor ac yn llwyddo i gyflwyno digwyddiadau mawr a chanlyniadau sylweddol. Bydd angen i’r enillwyr esbonio sut a pham y dechreuodd y cydweithio, beth oedd cyfraniad pob grŵp i gyflawni’r canlyniad, a pham na fyddai’n bosib i un gymdeithas gyflawni hynny ar ben ei hun.

Gwobrau Unigol

Mae’r gwobrau hyn er mwyn cydnabod cyfraniad eithriadol gan fyfyrwyr unigol tuag at gyfoethogi cymdeithasau a’r profiad myfyrwyr.

Rhennir y gwobrau unigol yn ddau fath o wobr, Aur ac Arian (yn debyg i’r drefn lliwiau hanner a llawn sydd gan yr Undeb Athletau).

Caiff gwobrau aur eu dyfarnu i unigolion sydd wedi cyfrannu tu hwnt i’r hyn sy’n ofynnol i gael effaith sylweddol ar gymdeithasau Bangor. Byddant wedi arddangos gwaith ac ymrwymiad arbennig a chyfraniad eithriadol i’w cymdeithas(au), byddant wedi perfformio eu swyddogaeth(au) ymhell tu hwnt i’r lefelau a ddisgwylid, gan gymryd tasgau ychwanegol ymlaen a dod â digwyddiadau, cyfeiriad ac arloesi newydd i’w cymdeithas(au). Mae’r Gwobrau Aur wedi’u cyfyngu i’w dyfarnu i unigolion sydd wedi cynnal cyfanswm o ddim llai na dwy flynedd o waith rheolaidd gyda chymdeithas.

Caiff Gwobrau Arian eu dyfarnu i unigolion sydd wedi bod yn ddylanwad cadarnhaol o fewn eu cymdeithas(au) eleni. Byddant wedi bod yn ddiwyd, yn cyflawni eu swyddogaeth(au) at safon uchel ac wedi cyfrannu amser, syniadau a chefnogaeth.